Benyamin

മഞ്ഞവെയിൽ മരണങ്ങൾ

Aboobacker Sidheeq M

മഞ്ഞവെയിൽ മരണങ്ങൾ: ബെന്യാമിൻ

 കഥക്കുള്ളിൽ കഥകളുള്ള നോവലാണ് 2011 ൽ പ്രസിദ്ധീകരിച്ച 'മഞ്ഞവെയിൽ മരണങ്ങൾ'. ഇന്ത്യൻ മഹാസമുദ്രത്തിലെ ബ്രിട്ടീഷ് ഇന്ത്യൻ ഓഷ്യൻ ടെറിട്ടറി (BIOT) യുടെ ഭാഗമായ ഡീഗോ ഗാർഷ്യ എന്ന ദ്വീപ് ആണ് കഥയുടെ പ്രധാന പ്ലോട്ട് .കൂടാതെ കേരളവും ചെന്നൈയും പോണ്ടിച്ചേരിയും കഥയുടെ ഭാഗമായി വരുന്നുണ്ട്.

 ഇപ്പോൾ നാലായിരത്തോളം മാത്രം ജനസംഖ്യയുള്ള ചെറിയ ഒരു ദ്വീപാണ് ഡീഗോ. അവിടത്തെ പ്രധാനകുടുംബമായ അന്ത്രപ്പേർ കുടുംബം നൂറ്റാണ്ടുകൾക്കു മുൻപ് ഇന്ത്യൻ വൻകരയിലെ പോണ്ടിച്ചേരിയിൽ നിന്നും കുടിയേറിയവരാണ് . പോർച്ചുഗീസുകാരും ഫ്രഞ്ചുകാരും അവസാനം ബ്രിട്ടീഷുകാരും ഭരണം കയ്യാളുന്ന ദ്വീപ് ഭരിക്കുന്നത് തിരഞ്ഞെടുക്കപ്പെട്ട ചാൻസലറാണ് .

 എഴുത്തുകാരനാവാൻ ആഗ്രഹിച്ചു വൻകരയിൽ വന്നു മലയാളത്തിൽ ഗ്രാജുവേഷൻ എടുത്ത ക്രിസ്റ്റി അന്ത്രപ്പേർ, തൻ്റെ സുഹൃത്തായിരുന്ന സെന്തിലിന്റെ കൊലപാതകത്തിൻറെ ചുരുളഴിക്കാനുള്ള ശ്രമങ്ങളും അതിനെത്തുടർന്നുണ്ടാവുന്ന സംഭവവികാസങ്ങളുമാണ് നോവലിൻറെ ഇതിവൃത്തം. കാലങ്ങൾക്കു ശേഷം അവിചാരിതമായി കണ്ടുമുട്ടുന്ന ജസീന്ത എന്ന സ്ക്കൂൾ സുഹൃത്തിനോട് കോഫീഷോപ്പിൽ സംസാരിച്ചിരിക്കുമ്പോൾ കാണുന്ന ഒരു വെടിവെപ്പും ആ വെടിവെപ്പിൽ കൊല്ലപ്പെട്ടത് അവരുടെ തന്നെ ക്ലാസ്മേറ്റായിരുന്ന സെന്തിലാണെന്നു അറിയുന്നതുമാണ് ക്രിസ്റ്റിയുടെ ജീവിതം വഴിതിരിക്കുന്നത്. അതിനെത്തുടർന്ന് ക്രിസ്റ്റി നടത്തുന്ന അന്വേഷണങ്ങൾ ഫലം കണ്ടുവോ എന്നു വായനക്കാർക്ക് നിശ്ചയിക്കാൻ കഴിയില്ലെങ്കിലും ഉടനീളം സംഭ്രമജനകമായ കുറ്റാന്വേഷണരൂപത്തിലാണ് കഥയുടെ ഗതി .

 തനിക്ക് ഇഷ്ട്ടപ്പെട്ട എഴുത്തുകാരനായ നോവലിസ്റ്റിനു email ആയി അയച്ചു കൊടുത്ത സ്വാനുഭാവങ്ങളുടെ ആദ്യഭാഗത്തിൽ നിന്നും എഴുത്തുകാരനും സുഹൃത്തുക്കളും അടുത്ത ഭാഗങ്ങൾ കണ്ടെത്തുന്നതിലും അത്യന്തം അവിചാരിതകളും ആശ്ചര്യതകളും വൈചിത്ര്യങ്ങളുമുണ്ട്.കഥാന്ത്യം നോവലിസ്റ്റും സംഘവും ആ ഭാഗികാനുഭവങ്ങളുടെ തുടർച്ചയ്ക്കു ശ്രമിക്കുന്നുമുണ്ട് .

 ക്രിസ്ത്യൻ സഭകളിലെ വൈവിദ്ധ്യങ്ങളും ആചാരങ്ങളിലെ പ്രാദേശികമായ കൂട്ടിച്ചേർക്കലുകളും അതിൻറെ ചരിത്രപശ്ചാത്തലവും കഥയുടെ ഭാഗമായി വരുന്നുണ്ട്. 

 സെന്തിലിനെ കൊന്നതാര്, അതിനുള്ള കാരണം,ക്രിസ്റ്റിയുടെ പപ്പയുടെ അദൃശ്യ ജീവിതം, അദ്ദേഹം അറസ്റ്റ് ചെയ്യപ്പെടാനുള്ള കാരണം, മെൽവിൻറെ മരണം കൊലപാതകമായിരുന്നോ, ക്രിസ്റ്റിക്കു എന്ത് സംഭവിച്ചു? അന്ത്രപ്പേർ കുടുംബത്തിന് എന്ത് സംഭവിച്ചു തുടങ്ങിയ ചോദ്യങ്ങൾക്കു വ്യക്തമായ ഉത്തരം വായനക്കാർക്കു ലഭിക്കില്ലെങ്കിലും ഉടനീളം ദുരൂഹതകൾ നിറഞ്ഞതും ആകാംക്ഷാഭരിതവുമാണ് നോവൽ. എട്ടാം ഭാഗം മുതൽ നോവലിൻറെ അവസാനം വരെ ഒരു ഇൻവെസ്റ്റിഗേഷൻ നോവലിന്റെ ക്ലൈമാക്സ് അനുഭവം നൽകുന്നുണ്ട്.

 'ആടുജീവിതം', തീക്ഷ്ണാനുഭവത്തിന്റെ കഥാവിഷ്കാരം എന്നും 'മാന്തളിരിലെ ഇരുപതു കമ്മ്യൂണിസ്റ്റു വർഷങ്ങൾ', ഒരു കുടുംബത്തിൻറെ കഥയെന്നും വിശേഷിപ്പിക്കാമെങ്കിൽ 'മഞ്ഞവെയിൽ മരണങ്ങൾ', രണ്ടിൻറെയും ഒരു മിശ്രാനുഭവവും കുറ്റാന്വേഷണവുമാണ് .

- അബൂബക്കർ സിദ്ദീഖ് കോഡൂർ

മഞ്ഞവെയിൽ മരണങ്ങൾ

Reviews